اللهْ يْقَدَّسْ!

الإهداء: ف خاطر سيدنا يعقوب فاش الذيب كلا يوسف بصح..

اللهْ يْقَدَّسْ! 

لَالّة.. 

قَدّس الله قلبك.. 

نعاود ليك خرافة 

ونْتِي قولي حقيقة 

ولا خيال 

الله أعلم.. 

القدس فين صلّى النبي 

قَرّْدت عند الجدار الفاصل 

وضحكات حتى بان الجرح اللّي مَعَمّرُو تْغَرَّزْ 

سال ومَعَمّْرو حْبس 

وْهِي كمّْلت الكلام 

بحال إيلا حتى شي ما كان 

قالت للقدس فين الصلاة تَلْفت 

ها واحد السلام عليكم 

وبقا الصّدى كيفرّقْ اللّغا مع الخَنْقة 

اللي وحلت ليه فكلام 

مْكجْكج عليه الذبان 

حاشا الدود اللي من نهار كثرو عليه الشهداء 

وهو بالجوع 

صايم كيتسنى الخونة 

اللي ما بقاوش كيموتو فزمان بَصْلة بدرهم ومعاها عَرّام عرب فابور 

..

قالت القدس فين صلى النبي: 

وعليكم السلام.. 

صرفقت أحلامها 

وحطّات خدها على الأوهام 

ورجعت لزمانها تتفل على يمينها 

ياك ما يكون تّقْلب الكتاب؟ 

نعسات.. 

شافت عَيرْ وكلاب 

حمير وذياب 

وشافت القرد حاكم 

وبلا أحكام كاع 

كَيْجيه البنان فْسِيفْة عاهرات لابسات العرا 

معطرات بنخوة.. 

بنكهة "الخْرَا" 

..

ثارت القدس فين ما صلاّش النبي 

هزت يديها 

احتجت 

وتمتمت كاع.. 

ما استسلمناش.. 

ما سلمناش.. 

قالت القدس فين صلى النبي: 

وْ هِيَّاش؟ 

عاود تكلمت أختها بالسمية: 

راهم متابعين بعميق الأسى 

من زمان تقاضى زمانك وبدا زماني 

وأنا تايقة فْ لعل وعسى 

ماشي لخاطري 

والسبع ما كيدخل للسيرك نزاهة.. 

ضحكت القدس فين صلى النبي 

وزادت ضحكت 

حتى ضحك الجدار 

ووشوش فودنيها: الله ينعل شيطانك.. 

هزت سيفها 

وعلى جبهتو الكحلا 

بالبيض كتبت: 

لالّة قدس الله تاريخك 

داك الحابس فغمزات الروح 

واللي بقا 

سَلّْكيه.. 

حتى يخرج حنظلة 

من مقام المسيح 

يصلي بالقدس فحجر النبي.. 

توفيق بوشري