حَلْم المْحَبّة..

إلى جيتك صدري عاري 

قصدت صورتي فمرايتك 

ماشي بقرايتي ولا بقرايتك 

بالإنسان الساكن فيا وفيك 

يفيّق فينا الحب الساري 

فقلوب غطاها الظلام 

حتى كذّبَتْ نورها 

وتاقت بالحقد دين وإيمان 

حتى اختل الميزان 

حتى ما بقى أمل بان 

حتى ما بقا أمان 

بحال إلا عمرو ما كان.. 

.. 

وعلاش ما تجينيش بصدرك 

نيشان.. 

فاتح ليا يديك بحور ووديان 

بمحبة ما واقفة على شرط 

حابس فحلق الوقت 

خانق بيناتنا البسمة 

حتى خفاها بالمكر الزمان 

.. 

علاش ما تجينيش 

كي نجيك 

علاش ما تعنقش أفكاري 

ونعنق فيك أسرارك 

نرقاو بهبالنا 

لسماه الزاهية 

المايلة لجيهة دين الحب.. 

.. 

جيني 

نجيك 

قتلني بالشوق ليا فيا 

نفنيك بالعشق فيك ليا 

يمكن يكتاب 

نعاودو بالفهامة 

نعرّفو كلمة الأحباب 

اللي ربي فسماه 

خلقهم من تراب 

وقدر عليهم السلم مكتاب 

إلى تابو للحكمة 

وعاقو باللي سباب العذاب 

قراية اللوح بالمقلوب 

حتى ضحك الشيطان 

بين الارض السابعة 

والسما الغايبة 

حتى شبع دم 

وتفرج فبنادم 

كيبني ويهدم 

وما حشم.. 

حتى ما فهم وهو شيطان 

آش هاذ الهم..؟ 

.. 

جيني 

نجيك 

كاشفين صدورنا 

قابلين عيوبنا 

فاتحين قلوبنا 

قاتلين العداوة 

بسلاح العقل والصفاوة 

ذابحين الجهالة 

بالعلم والنقاوة 

شايفينا فينا 

وردة 

مغروسة بينا 

فايحة بعطور 

منا لينا.. 

منا لينا 

منا لينا 

توعينا فين ما تهنا وعمينا.. 

توفيق بوشري 

الجديدة 

يناير 2019